Qëlloi veten me plumb në kokë, ndërron jetë vëllai i këngëtares Sheila Haxhiraj

Një tragjedi ka ndodhur këtë të martë në kryeqytet, ku Henri Haxhiraj, 37 vjeç, punonjës i Gardës së Republikës dhe vëllai i këngëtares së njohur Sheila Haxhiraj, ka ndërruar jetë pas një akti ekstrem. Henri qëlloi veten me armë zjarri në banesën e tij në zonën e Qytetit të Studentit, duke i shkaktuar vetes një plagë fatale në kokë. Predha përshkoi kafkën, duke bërë që ai të humbiste jetën pavarësisht ndërhyrjes së shpejtë mjekësore.

Edhe pse u dërgua me urgjencë në Spitalin Ushtarak dhe iu dha ndihma e specializuar, 37-vjeçari nuk mundi t’i mbijetonte plagëve të marra. Policia e Tiranës ka nisur hetimet për të zbuluar rrethanat dhe motivet që çuan në këtë akt tragjik.

Henri Haxhiraj nuk ishte një emër i panjohur për autoritetet, pasi më herët, në janar të vitit 2022, ai ishte përfshirë në një hetim të policisë lidhur me një grup të dyshuar për falsifikimin e dokumenteve të identifikimit. Në atë kohë, ai së bashku me të tjerë përfitonin shuma të mëdha parash nga aktivitetet e tyre të paligjshme.

Ngjarja ka tronditur familjen Haxhiraj dhe veçanërisht motrën e tij, Sheila Haxhiraj, e cila është një emër i njohur në muzikën shqiptare. Miqtë dhe të afërmit e familjes janë mbledhur për të përkrahur Sheilën në këtë moment të vështirë dhe për të nderuar kujtimin e të ndjerit.