Punonjësi humbi jetën nga rryma elektrike – Prokuroria e Kukësit merr nën hetim drejtorët e Bashkisë Tropojë

Prokuroria pranë Gjykatës së Shkallës së Parë të Juridiksionit të Përgjithshëm Kukës ka urdhëruar ndalimin e Drejtorit të Shërbimeve Publike, Turizmit dhe Transportit në Bashkinë Tropojë, shtetasit N.Gj., si dhe të teknikut të mirëmbajtjes së rrugëve, G.H. Zyrtarët e bashkisë u ndaluan nën akuzat për “Shpërdorim detyre” dhe “Shkelja e rregullave të mbrojtjes në punë”, vijim i hetimeve për aksidentin fatal me bazë mungesën e sigurisë në punë.

Hetimet lidhen me ngjarjen e rëndë të ndodhur më 8 shtator 2026 në fshatin Bujan të Tropojës. Katër punonjës të bashkisë — M.S., A.D., I.D. dhe A.A. — po punonin për montimin e një shtylle të ndriçimit rrugor në zonë, ku gjatë procesit të ngritjes kanë rënë në kontakt të drejtpërdrejtë me përcjellësit elektrikë.

Si pasojë e goditjes nga rryma elektrike, punonjësi M.S. ka humbur jetën në vendngjarje, ndërsa tre punonjësit e tjerë kanë mbetur të plagosur me dëmtime trupore.

Ndalimi i dy zyrtarëve u krye në kuadër të procedimit penal nr. 390 të vitit 2026. Sipas organit të akuzës, drejtori dhe tekniku i bashkisë nuk kanë garantuar kushtet teknike dhe ligjore të mbrojtjes në punë për punonjësit e terrenit, duke sjellë për pasojë humbjen e jetës së njërit prej tyre dhe rrezikimin e tre të tjerëve.