Policia zbulon “tunelin” plot me drogë afër pallatit në Kuçovë, arrestohet 48-vjeçari që i tregtonte

Policia ka prangosur një 48-vjeçar nga Kuçova pasi u kap me lëndë narkotike, gati për shitje.

Pas kontroleve nga policia, 48-vjeçarit iu gjet hashash me vete, dhe pas kontrollit pranë banesës iu zbulua një tunel afër një pallati, në rrugën “Dalip Zavalani”, ku kishte fshehur dozat gati për tregtim.

Njoftimi i policisë:

Goditje të njëpasnjëshme kundër veprimtarisë kriminale të shitjes së lëndëve narkotike, në doza.

U kap në flagrancë, me doza kanabisi të gatshme për shitje, vihet në pranga 48-vjeçari. Zbulohet vendi ku 48-vjeçari fshihte dozat. 

Si rezultat i kontrolleve të kryera bazuar në informacionet e siguruara në rrugë operative, shërbimet e Komisariatit të Policisë Nr. 1 kanë evidentuar dhe goditur një tjetër rast të veprimtarisë kriminale të shitjes së lëndëve narkotike, në doza.

Për këtë rast nga specialistët e Seksionit të Narkotikëve u vu në pranga autori i dyshuar, shtetasi A. Xh., 48 vjeç, banues në Kuçovë, i cili u kap në flagrancë me doza kanabisi të gatshme për shitje.

Shërbimet e Policisë, në vijim të kontrolleve, në një tunel afër një pallati, në rrugën “Dalip Zavalani”, kanë gjetur doza kanabisi të gatshme për shitje, të cilat dyshohet se i kishte fshehur ky shtetas.  

Dozat u sekuestruan në cilësinë e provës materiale.