Plani i Rritjes për Ballkanin, Koopman: Shqipëria dhe Mali i Zi po performojnë më mirë! Serbia dhe RMV selektive

Drejtor i Përgjithshëm i Drejtorisë së Përgjithshme për Zgjerimin dhe Fqinjësinë Lindore të Komisionit Evropian, Gert Jan Koopman ka deklaruar se Shqipëria dhe Mali i Zi arritën rezultatet më të për përmbushjen e kritereve të nevojshme për marrjen e fondeve nga Plani i Rritjes së BE-së për Ballkanin Perëndimor.

Koopman më tej theksoi se Serbia dhe Maqedonia e Veriut zbatuan reformat në mënyrë më selektive. Sa i përket, Kosovës dhe Bosnje dhe Hercegovinës për shkak të vështirësive të brendshme, nuk janë paguar ende parafinancimet.

 “Në kategorinë e parë janë Shqipëria dhe Mali i Zi, të cilat në thelb po punojnë për zbatimin e të gjitha reformave, në të dytën janë Serbia dhe Maqedonia e Veriut, të cilat ishin më selektive, gjë që çoi në rezultate më të ulëta kur bëhet fjalë për reformat, por kohët e fundit ka pasur indikacione se ky ritëm zbatimi mund të përshpejtohet edhe në këto vende”, tha ai.

Nga ana tjetër Koopman e cilësoi vitin që lamë pas si një vit shumë i rëndësishëm për zbatimin e Planit të Rritjes. Teksa foli me shifra, ai u shpreh se deri më tani rreth 453 milionë euro u janë paguar partnerëve nga Ballkani Perëndimor.

Sipas tij pagesa varet vetëm nga zbatimi i hapave nga axhendat e reformave. Ai theksoi gjithashtu se zbatimi i rreth 85% të masave nga axhendat e reformave, të cilat parashikoheshin të zbatoheshin deri në dhjetor 2025, është në proces, ndërsa rreth 38% e masave janë përmbushur plotësisht, gjë që ai e përshkroi si një rezultat të mirë.

“Plani i Rritjes lehtëson integrimin në Tregun e Përbashkët, nga njëra anë, por gjithashtu është një instrument i rëndësishëm për të çuar përpara procesin e pranimit, pasi shumë nga hapat në axhendat e reformave bazohen në themelet”, tha ai.