Pas vrasjes së gjyqtarit Astrit Kalaja, deputetët inspektojnë Gjykatën e Korçës

Pas ngjarjes së rëndë të ndodhur në Gjykatën e Apelit në Tiranë, ku u vra gjyqtari Astrit Kalaja, deputetët kanë nisur inspektime në gjykatat e vendit për të verifikuar masat e sigurisë.

Në këtë kuadër, një grup deputetësh zhvilluan një vizitë në ambientet e Gjykatës së Korçës.

Deputeti i Partisë Socialiste, Bledi Como, bëri të ditur se inspektimi vjen pas një kërkese të Këshillit të Lartë Gjyqësor, me qëllim rritjen e sigurisë në institucionet e drejtësisë dhe parandalimin e ngjarjeve të ngjashme në të ardhmen.

“Pas ngjarjes së ndodhur në Gjykatën e Apelit të Tiranës, kemi zhvilluar disa takime me institucionet përkatëse dhe kemi dalë në terren për të parë konkretisht kushtet e sigurisë në gjykata. Më pas, çështja do të trajtohet në komision parlamentar me institucionet e pavarura të sistemit të drejtësisë, përfshirë KLGJ dhe KLP,” u shpreh Como.

Ai theksoi se fokusi i deputetëve është përmirësimi i sigurisë fizike, infrastrukturore dhe teknologjike në gjykata, duke sqaruar se nuk bëhet fjalë për monitorim të vendimmarrjes gjyqësore.

Sipas Comos, Gjykata e Korçës është një nga gjykatat më të mira në Republikën e Shqipërisë përsa i përket kushteve dhe organizimit të punës, duke u konsideruar një model për institucionet e tjera të drejtësisë që ende nuk i përmbushin këto standarde.

Në përfundim të inspektimeve do të hartohet një raport përfundimtar, i cili pritet t’u paraqitet institucioneve përgjegjëse dhe Kuvendit, me synim zgjerimin e bashkëpunimit dhe gjetjen e një zgjidhjeje përfundimtare për rritjen e sigurisë në të gjitha ambientet e gjyqësorit dhe prokurorisë.