Një nga bashkëpunëtorët e efektivit të RENEA-s i dënuar për trafik droge, sapo kishte dalë nga burgu

Ky është Ded Nimani, i arrestuar sot nga policia e shtetit gjatë operacionit antidrogë të koduar "Baron", ku u sekuestruan 1 kg lëndë narkotike e llojit kokainë.

Mësohet se ai nuk kishte shumë kohë që kishte dalë nga burgu, pas kryerjes së dënimit për trafik droge.

Bashkë me të u arrestuan dhe efektivi i RENEA-s, Xhulio Liçi dhe Luan Gaçi.

Kapja e tyre është bërë në aksin rrugor Tiranë -Durrës, rruga e vjetër në zonën e Ndroqit. Efekti i RENEA-s Liçi dhe shtetasi Ded Nimani janë kapur në flagrancë së bashku me shtetasin Luan Gaçi me një pako lëndë narkotike kokainë.

Në cilësinë e provës materiale u sekuestrua lënda narkotike me peshë totale 1 kilogramë e 88 gramë, dy automjete, pesë aparate celular dhe një armë zjarri pistoletë me municion luftarak.

Nën drejtimin e Prokurorisë vijon puna për identifikimin dhe kapjen e personave të tjerë të përfshirë në këtë veprimtari kriminale.

Materialet i  kaluan Prokurorisë  së rrethit Gjyqësor Tiranë për veprime të mëtejshme për veprën penale "Prodhim dhe shitja e narkotikëve” e kryer në bashkëpunim.