Një dekadë në sistemin e drejtësisë, kush është gjyqtarja që liroi Sali Berishën

Flojera Davidhi është gjyqtarja e posaçme që ka vendosur këtë të mërkurë të lirojë nga arresti shtëpiak ish-kryeministrin Sali Berisha. Pas gati një viti i izoluar në apartamentin e tij te "Rruga e Salës", Gjykata e Posaçme ka vendosur të rrëzojë masën e sigurisë për Sali Berishën.

Lideri demokrat ndodhej në "Arrest në shtëpi" prej 30 Dhjetorit 2023, kur Gjykata e Posaçme vendosi t'i kufizonte Sali Berishës lirinë, në kushtet kur ai nuk pranoi të paraqitej vullnetarisht përpara togave të zeza për dosjen e privatizimit të ish-kompleksit "Partizani".

Kush është gjyqtarja Flojera Davidhi

Flojera Davidhi përfundoi studimet në Shkollën e Magjistraturës në vitin 2014 dhe pas një periudhe stazhi në Gjykatën e Tiranës, u emërua gjyqtare në Gjykatën e Korçës. Në tetor 2019, Davidhi u komandua për një periudhë 2-vjeçare si këshilltare ligjore pranë Njësisë Mbështetëse të komisioneve në Këshillin e Lartë Gjyqësor.

Ndërkohë, dy vite më pas, ajo ka kaluar me sukses procesin e vettingut. Trupi gjykues i KPK, i kryesuar nga Pamela Qirko, me relatore Etleda Çiftjan dhe anëtar Roland Ilian arritën në përfundimin se Davidhi kishte arritur nivel të besueshëm në vlerësimin e pasurisë dhe të figurës si dhe nivel kualifikues në vlerësimin e aftësive profesionale. Në cilësinë e vëzhgueses ndërkombëtare ishte e pranishme Elka Ermenkova.