Në kërkim për një seri vjedhjesh, arrestohet për llogari të Italisë shqiptari me 7 identitete

Një 42-vjeçar shqiptar, i shpallur në kërkim prej vitit 2022 për një seri vjedhjesh të kryera në Itali, është arrestuar në aeroportin “Fiumicino” të Romës.

Bëhet fjalë për shtetasin me inicialet D.M.A., i lindur në vitin 1984, i cili duhet të vuajë një dënim prej 5 vitesh, 9 muajsh e 5 ditësh burg, si dhe një gjobë prej 1,640 eurosh.

Sipas të dhënave të hetimit, 42-vjeçari ishte fshehur për vite me radhë në zonat malore të Shqipërisë lindore, pranë kufirit me Maqedoninë e Veriut, me qëllim shmangien e drejtësisë italiane.

Vendndodhja e tij u identifikua nga ekipi Catturandi i njësisë hetimore të Repartit Operativ të Komandës Provinciale të Karabinierëve të Pordenones. Pas konfirmimit të vendndodhjes, autoritetet italiane vijuan me procedurat për ekzekutimin e vendimit të drejtësisë.

Më 11 mars, shqiptari u arrestua nga autoritetet shqiptare në portin e Durrësit. Pas përfundimit të procedurave të ekstradimit, ai u shoqërua nga personeli i shërbimit për bashkëpunimin ndërkombëtar policor dhe u nis drejt Italisë me një fluturim nga Rinasi.

Me mbërritjen në aeroportin “Fiumicino”, ai u arrestua nga efektivët e policisë kufitare ajrore të Romës dhe më pas, pas verifikimeve të nevojshme, u dërgua në burgun e Viterbos.

Gjatë aktivitetit të tij kriminal, shqiptari dyshohet se kishte përdorur të paktën shtatë identitete të ndryshme për t’iu shmangur kontrolleve të autoriteteve.

Në vitin 2016, kur u ndalua nga karabinierët në Caorle, atij iu gjet një kartë identiteti rumune e falsifikuar. Për këtë rast, ndaj tij u ngrit edhe akuza për posedim dhe falsifikim dokumentesh.

Vjedhjet për të cilat është dënuar janë kryer kryesisht në zonat turistike të Lignano Sabbiadoros, në provincën e Udines, dhe Caorles, në provincën e Venezias.

Sipas hetimeve, ai kishte vepruar në banesa pushimi dhe dhoma hotelesh, duke u përfshirë në të paktën gjashtë raste vjedhjesh. Atij i atribuohet gjithashtu një vjedhje në një banesë në Romë, e kryer në shtator të vitit 2015.

Pas një arratie disa-vjeçare, shqiptari tashmë ndodhet në një burg italian, ku do të vuajë pjesën e mbetur të dënimit të dhënë nga drejtësia italiane.