Në kërkim nga drejtësia italiane për trafik droge, Interpol arreston 44-vjeçarin shqiptar (Emri)

Ka përfunduar në burg Eugen Vasili, 44-vjeçari i shpallur në kërkim për trafik droge nga drejtësia italiane. Sipas policisë, shtetasi në fjalë është dënuar me 4 vite e 9 muaj burg dhe pas ekstradimit, ai do vuajë 2 vite e 5 muaj burg.

“Tiranë/ Vijon puna për kapjen e personave në kërkim kombëtar dhe ndërkombëtar. Ndalohet 44-vjeçari i dënuar jashtë dhe brenda vendit, për veprën penale “Trafikimi i narkotikëve”. Specialistët për Hetimin e Krimit në Komisariatin e Policisë Nr. 1, në bashkëpunim me Seksionin për Hetimin e Narkotikëve dhe Interpol Tirana, bënë kapjen dhe ekzekutimin e vendimit për shtetasin në kërkim Eugen Vasili alias Eugen Lici alias Genti Goxhaj alias Gentjan Goxhaj, 44 vjeç, banues në Tiranë.

Këtë shtetas, Prokuroria e Milanos e ka dënuar me 4 vjet e 9 muaj burg për veprën penale “Trafikimi i narkotikëve”. Gjithashtu, ky vendim është njohur dhe nga Gjykata e Apelit Tiranë, e cila ka vendosur se pas ekzekutimit të këtij vendimi, këtij shtetasi i mbeten për të vuajtur edhe 2 vjet e 5 muaj burgim.

Interpol Tirana, në bashkëpunim me Interpol Romën, vijon procedurat për ekstradimin e këtij shtetasi drejt Italisë”, njofton policia.