Ndëshkohen shoferët “rebelë” në Durrës, procedohet vlonjati që tentoi të korruptonte policinë

Policia Rrugore e Durrësit ka proceduar penalisht një 61-vjeçar nga Vlora, i cili tentoi të korruptonte punonjësit e policisë.

Blutë njoftojnë se burri tentoi t’i jepte policit 1500 lekë që të shmangte gjobën.

Në total, numri i personave të proceduar apo arrestuar ka shkuar në 10.

Njoftimi i policisë:

Shkon në 10 numri i drejtuesve të automjeteve të arrestuar/proceduar penalisht, që kanë tentuar të korruptojnë punonjësit e Policisë, me qëllim shmangien e përgjegjësisë penale apo administrative.

Goditet një tjetër rast i tentativës për të korruptuar punonjësit e Policisë Rrugore.

Procedohet penalisht 61-vjeçari që ofroi para, për të mos u ndëshkuar administrativisht.

Gjatë patrullimit me objektiv parandalimin e aksidenteve dhe ndëshkimin e shkelësve të rregullave të qarkullimit rrugor, shërbimet e Policisë Rrugore të Durrësit i bënë shenjë ndalimi, një automjeti që u konstatua në rrugën “Martin Camaj”, duke lëvizur kundërvajtje.

Gjatë veprimeve të punonjësve të Policisë, drejtuesi i automjetit iu ka ofruar atyre 1 500 lekë, me qëllim shmangien e masës administrative për shkeljen e kryer.

Në përfundim të veprimeve procedurale për këtë rast, u kryen veprimet administrative dhe u referuan materialet në Prokurori ku nisi procedimi në gjendje të lirë për shtetasin L. C., 61 vjeç, banues në Vlorë, për veprën penale “Korrupsioni aktiv i personave që ushtrojnë funksione publike”.

Materialet procedurale iu referuan Prokurorisë së Durrësit, për veprime të mëtejshme.