Moti i keq në vend, OSHEE: Ja në cilat qytete janë raportuar probleme

Vendi është përfshirë nga moti keq me reshje shiu dhe dëbore, ndërsa Operatori i Shpërndarjes së Energjisë Elektrike (OSHEE) bën të ditur se situata e furnizimit me energji elektrike është e qëndrueshme.

Zyra e shtypit e OSHEE-së bën të ditur se zonat qendrore të vendit po furnizohen normalisht me energji, ndërsa janë raportuar problematika kryesisht në zonat e thella malore.

“Situata duket e qëndrueshme në zonën e juglindjes. Ka raportime për probleme në furnizimin me energji në disa zona të thella rurale, por zonat qendrore furnizohen normalisht. Probleme janë raportuar në zonat e Dibrës dhe Kukësit, për shkak të reshjeve, ku punonjësit e OSSH-së pengohen të avancojnë me punimet”, bën të ditur OSHEE.

Sipas OSHEE-së, rrjeti i tensionit të lartë është i gjithi në punë.

Gjithashtu, sipas OSHEE, fiderat 20/10/6kV që furnizojnë me energji elektrike hidrovorët dhe institucionet e rëndësisë së veçantë janë në funksion të plotë.