Mesazh me plumba ndaj gruas?! Reagon policia për atentatin në Mat: U qëllua drejt "Audit" të parkuar në oborr

Policia e Shtetit ka reaguar për ngjarjen e ndodhur mbrëmjen e 12 shtatorit në fshatin Urakë, në Njësinë Administrative Rukaj, bashkia Mat, ku një automjet është qëlluar me armë zjarri.

Sipas policisë, rreth orës 23:10, persona ende të paidentifikuar kanë qëlluar me armë zjarri në drejtim të një automjeti tip “Audi”, në pronësi të shtetases S. Ll. (bashkëshortja e shtetasit A. Ll.), i cili ishte i parkuar në oborrin e banesës. Nga të shtënat janë shkaktuar vetëm dëme materiale në automjet.

Menjëherë pas marrjes së njoftimit, shërbimet e Policisë kanë shkuar në vendngjarje dhe, në bashkëpunim me DVP Dibër, kanë ngritur pika kontrolli. Në vendngjarje ka mbërritur edhe grupi hetimor.

Gjatë kontrolleve të territorit, rreth 2 kilometra larg vendit të ngjarjes, në aksin Rrëshen-Burrel, policia ka konstatuar një automjet tip “Golf V” të djegur.

Në brendësi të automjetit janë gjetur dy armë zjarri kallashnikov, të cilat ishin djegur pjesërisht. Armët janë sekuestruar në cilësinë e provës materiale.

Nga verifikimet rezultoi se automjeti “Golf V” ishte shpallur në kërkim nga DVP Elbasan më 31 korrik 2025, pasi pronari i tij, shtetasi K. R., banues në Përrenjas, kishte kallëzuar vjedhjen e automjetit.

Policia vijon kontrollet në zonat ku dyshohet se mund të kenë lëvizur autorët, ndërsa po bashkëpunohet edhe me DVP Tiranë, Lezhë dhe Kukës.

Nën drejtimin e Prokurorisë, grupi hetimor vijon veprimet për zbardhjen e plotë të rrethanave, sigurimin e provave dhe identifikimin dhe kapjen e autorëve./vizionplus.tv