Mendova se më kapën plumbat’, zbardhet dëshmia e shoqëruesit në makinë të Bledar Birçajt

VLORË- ‘Jam i tronditur, mendova se më kapën plumbat’, kjo është një pjesë e dëshmisë së shoqëruesit të Bledar Birçajt, i cili u ekzekutua mesditën e djeshme në Vlorë nga një atentat i mirëorganizuar. Shoqëruesi i Birçajt ishte ulur në vendin e parë në makinën, ku u vra me breshëri plumbash 38-vjeçari, dhe shpëtoi mrekullisht pa u lënduar.

Mësohet se ai ka deklaruar se ka parë disa persona të maskuar të cilët nuk i ka njohur, ndërkohë që ka shtuar se ishte shumë i tronditur nga ajo që ndodhi.

‘Ishim të papërgatitur, na bënë pritë. Ramë direkt pre e breshërisë së kallashnikovit. Pashë dy veta me maska, por nuk i njoha dot. Ishin të kamufluar. Nuk jam në dijeni të ndonjë konflikti të fundit. Jam i tronditur, mendova se më kapën edhe mua plumbat.’- mësohet të ketë thënë shoqëruesi i Bledar Birçajt.

Policia ka shoqëruar më shumë se 15 persona të cilët janë marrë në pyetje që prej ditës së djeshme.

Në vendin e ngjarjes u gjetën mbi 30 gëzhoja. Makina autorëve mund të jetë strehuar edhe ndonjë garazh pasi nuk ka asnjë gjurmë deri tani.