Mbante armë pa leje, arrestohet 38-vjeçari në Berat, dyshohet për vjedhje të ndodhur një muaj më parë

Policia e Beratit ka arrestuar ditën e sotme një 38-vjeçar, pasi iu gjetën në shtëpi një automatic pa leje, gjithashtu 7 fishekë dhe një krehër. Sipas policisë, i riu dyshohet për vjedhjen e një shume të mëdha parash në një karburant, ngjarje që ka ndodhur me 22 prill të këtij viti

“Berat/ Vijon puna për goditjen e paligjshmërisë në fushën e armëmbajtjes pa leje. Vihet në pranga një 38-vjeçar që dispononte armë zjarri pa leje. Nga hetimet paraprake ky shtetas dyshohet dhe si autor i një vjedhjeje të ndodhur më parë.

Në vijim të punës për parandalimin, evidentimin dhe goditjen e paligjshmërisë, specialistët e krimeve në Komisariatin e Policisë Berat, në bazë të informacioneve të marra se një shtetas, në fshatin Kutalli, Dimal, dispononte armë zjarri në banesë, kanë organizuar punën dhe kanë ushtruar kontroll në banesën e shtetasit M. B.

Gjatë kontrollit të banesës, Policia gjeti dhe sekuestroi në cilësinë e provës materiale 1 armë zjarri automatik, një krehër dhe 7 fishekë. Gjatë veprimeve hetimore paraprake rezultoi se shtetasi M. B., 38 vjeç, është autor i dyshuar i vjedhjes së një shume parash në një pikë karburanti, në datën 22.04.2021. Materialet procedurale i kaluan Prokurorisë pranë Gjykatës së Shkallës së Parë Berat, për veprime të mëtejshme.”, njofton policia.