Letër-porosi nga Belgjika, SPAK kryen kontrolle në 4 ambiente në Berat. Ja çfarë u gjet

SPAK ka kryer kontrolle në katër ambiente në Berat pas një letërporosie të autoriteteve belge. Raportohet se gjatë operacionit u arrestua një 33-vjeçar me iniciale H. V., pasi iu gjetën në banesë dokumente false, elektroshok dhe fishekë arme gjahu.

Kontrollet u kryen në 4 ambiente, në bashkëpunim me SPAK-un, BKH-në dhe Prokurorinë e Beratit.

“Si rezultat i kontrolleve të kryera në 4 ambiente, në bashkëpunim me SPAK-un, me BKH-në dhe me Prokurorinë e Beratit, në zbatim të një letërporosie të autoriteteve belge, specialistët e Seksionit për Hetimin e Krimit Ekonomik dhe Financiar të DVP Berat arrestuan në flagrancë shtetasin H. V., 33 vjeç.

Në banesën e këtij shtetasi, në lagjen “28 Nëntori”, u gjetën 1 kartë identiteti dhe 1 leje drejtimi për automjet, të dyshuara false, si dhe 1 elektroshok dhe disa fishekë arme gjahu.”– njofton policia.

Materialet procedurale iu referuan Prokurorisë së Beratit, për veprime të mëtejshme.