Lajm i mirë nga BE-ja për Shqipërinë: Dritë jeshile për mbylljen e 3 kapitujve negociues

Shqipëria pritet të hedhë një tjetër hap të rëndësishëm në rrugën drejt integrimit europian, pasi javën e ardhshme pritet të mbyllë tre kapituj të tjerë të negociatave për anëtarësim në Bashkimin Europian.

Sipas agjencisë rajonale të lajmeve DTT, me propozim të Presidencës irlandeze të Këshillit të BE-së, ambasadorët e 27 vendeve anëtare kanë nisur diskutimet për mbylljen e këtyre kapitujve.

Ky zhvillim vjen pas vlerësimeve pozitive të bëra së fundmi nga Presidentja e Komisionit Europian, Ursula von der Leyen, dhe Përfaqësuesja e Lartë e Bashkimit Europian për Politikën e Jashtme dhe Sigurinë, Kaja Kallas, të cilat kanë përgëzuar Shqipërinë për ecurinë e reformave në kuadër të procesit të integrimit.

Ndërkohë, më 14 korrik, në Bruksel, gjatë takimit të ministrave të Çështjeve Evropiane, Mali i Zi pritet të mbyllë edhe dy kapituj të tjerë të negociatave, përkatësisht Kapitullin 8 (Konkurrenca) dhe Kapitullin 29 (Bashkimi Doganor).

Po në të njëjtën ditë, Moldavia dhe Ukraina pritet të hedhin një tjetër hap në procesin e tyre të anëtarësimit në BE, duke hapur grupet e para të kapitujve negociues.

Pas marrjes së një vlerësimi pozitiv për raportin IBAR, Shqipëria synon të përmbyllë të gjithë kapitujt e negociatave brenda dy viteve të ardhshme, me objektivin për t'u bërë anëtare me të drejta të plota e Bashkimit Europian në vitin 2030.