Kuvendi miratoi formulën e re të pagave për magjistratët, ligji hyn menjëherë në fuqi

Ligji që ndryshon mënyrën e përcaktimit të pagave të gjyqtarëve dhe prokurorëve u miratua nga Kuvendi gjatë orëve të para të mëngjesit, u dekretua nga presidenti dhe tashmë është botuar në Fletoren Zyrtare, duke hyrë zyrtarisht në fuqi.

Sipas ndryshimeve, paga referuese bazë për funksionet gjyqësore dhe të prokurorisë do të jetë e barabartë me 0.38-fishin e pagës së Presidentit të Republikës. Indeksimi i kësaj page do të bëhet me vendim të Këshillit të Ministrave, jo më vonë se çdo dy vjet nga indeksimi paraardhës.

Ligji specifikon gjithashtu se çdo ndryshim i pagës referuese bazë do të prodhojë efekte vetëm për gjyqtarët, prokurorët, si dhe anëtarët e kryetarin e Gjykatës Kushtetuese.

Për funksionarët dhe nëpunësit e tjerë publikë, pagat e të cilëve janë të lidhura me atë të gjyqtarit apo prokurorit, do të vazhdojë të përdoret paga referuese bazë e përcaktuar përpara vendimit nr. 15, datë 17 shkurt 2026, të Gjykatës Kushtetuese.

Ligji hyn në fuqi menjëherë dhe shtrin efektet financiare që nga 1 prilli 2023, por vetëm përsa u përket pagave të gjyqtarëve, prokurorëve, si dhe anëtarëve e kryetarit të Gjykatës Kushtetuese.