Kur do të marrë fund Covid-19? Skënder Brataj ka një përgjigje optimiste

Skënder Brataj, Shefi i Urgjencave Kombëtare dhe anëtari i Komitetit të Ekspertëve, u shpreh optimist se pranvera e ardhshme do të shënojë edhe fundin e pandemisë nga koronavirusi në vendin tonë.

“Pranvera e ardhshme do jetë fundi i Covid, jam optimist se në fund të këtij viti do të kemi një numër të lartë të të vaksinuarve, në pranverën e ardhshme ne do kemi të vaksinuar të gjithë popullsinë”,- tha Brataj në emisionin "Breaking" në Top News.

Sa i përket çështjes së mungesës së vaksinave kineze gjatë këtyre ditëve, Brataj tha se “për radhët e gjata të krijuara pasi mungojnë dozat e dyta Sinovac, personat duhet të bisedojnë me mjekët e familjes në mënyrë që t'i shmangin ato”.

“Virusi ekziston akoma, lirimi i masave do hiqen në mënyrë graduale, duam të kapim shifrën e 1 milion vaksinave. Me ecjen përpara të vaksinimit do merremi dhe me heqjen e masave në mënyrë graduale.

Ka një ulje të telefonatave nga 12 mije telefonata më parë kemi rënë në 2 mijë telefonata.
Për pensionistët, vonesat e marrjes së dozës së dytë nuk ka problem, sepse përgjigjja imunitare me ato mosha është më i ngadaltë. Jam optimist se në fund të këtij viti do të kemi një numër të lartë të të vaksinuarve, në pranverën e ardhshme ne do kemi të vaksinuar të gjithë popullsinë. Pranvera e ardhshme do jetë fundi i Covid“,- tha Brataj.