Kreu i ILD-së në SHBA/ Takime në Departamentin e Drejtësisë për ‘pastrimin’ e sistemit gjyqësor në Shqipëri

Inspektori i Lartë i Drejtësisë, Artur Metani, ka zhvilluar një vizitë zyrtare në Shtetet e Bashkuara të Amerikës, ku ka zhvilluar takime në Departamenti i Drejtësisë i SHBA-së dhe me përfaqësues të institucioneve të sistemit të drejtësisë amerikane.

Gjatë vizitës janë trajtuar çështje që lidhen me funksionimin e sistemit gjyqësor në Shqipëri dhe rolin e Inspektorit të Lartë të Drejtësisë në garantimin e integritetit dhe profesionalizmit.

Është diskutuar edhe rëndësia e një gjyqësori të pavarur dhe njëkohësisht të përgjegjshëm për funksionimin normal të shtetit të së drejtës.

Në kuadër të takimeve, në zyrën e OPDAT, Metani është takuar me drejtues dhe ekspertë të kësaj strukture, ku është folur për forcimin e standardeve etike dhe profesionale në sistemin gjyqësor shqiptar.

Në fokus ka qenë edhe përmirësimi i mekanizmave të inspektimit dhe rritja e llogaridhënies për gjyqtarët dhe prokurorët.

Pala amerikane ka vlerësuar progresin e bërë deri tani dhe është shprehur e gatshme për të vijuar mbështetjen, sidomos në aspektin e asistencës teknike dhe shkëmbimit të eksperiencave.

Vizita shihet si një hap tjetër në forcimin e bashkëpunimit mes institucioneve shqiptare dhe atyre amerikane, me synim përmirësimin e sistemit të drejtësisë dhe rritjen e besimit të qytetarëve.