Kongresi Botëror i Ligjit në Tiranë/ Mblidhen 600 personalitete të drejtësisë, zbardhet agjenda

Shqipëria pritet të jetë në qendër të vëmendjes ndërkombëtare për drejtësinë gjatë tre ditëve, nga 6 deri më 8 maj, kur në Tiranë dhe më pas në Berat do të zhvillohet “Kongresi Botëror i Ligjit”.

Në këtë aktivitet do të marrin pjesë rreth 600 personalitete të fushës së jurisprudencës nga vende të ndryshme të botës. Ky takim konsiderohet si sesioni hapës i Kongresit Botëror të Drejtësisë, i planifikuar të mbahet në Shqipëri në vitin 2027, ku pritet pjesëmarrja e rreth 5 mijë gjyqtarëve dhe krerëve të shteteve, si dhe dhënia e një çmimi ndërkombëtar të drejtësisë, shpesh i cilësuar si “Nobeli i drejtësisë”.

Gjatë tre ditëve të aktivitetit, që përkon edhe me Javën e Drejtësisë dhe kulmon më 10 maj, do të organizohen takime dhe tryeza diskutimi mbi reformën në drejtësi dhe zhvillimet në sistemin gjyqësor.

Më 6 maj është parashikuar dhënia e titullit “Honoris Causa” për disa personalitete të drejtësisë shqiptare dhe të huaj. Ndërsa në datat 7 dhe 8 maj, punimet do të drejtohen nga ministri i Drejtësisë, Toni Gogu, ku do të diskutohen arritjet e reformës në drejtësi dhe sfidat që mbeten përpara.

Një nga temat kryesore të debatit do të jetë edhe procesi i Vettingut, i cili ka zgjatur afro nëntë vite dhe pritet të ketë një fazë përmbyllëse gjatë muajit qershor.