Incidenti me të shtëna në Golem/ Policia arreston dy persona, njëri theu masën e arrestit

Policia e Shtetit ka dalë me një tjetër njoftim zyrtar në lidhje me ngjarjen e ndodhur mbrëmjen e së mërkurës në Golem, ku thotë se ka arrestuar dy persona. Drejtoria Vendore e Policisë Durrës bën me dije se njëri prej tyre, 38-vjeçari A.B., kishte thyer masën e sigurisë “Arrest në shtëpi”.

“U bë arrestimi në flagrancë i shtetasve A.B., 38 vjeç, banues në Golem, dhe A.Sh., 23 vjeç, banues në Tiranë. Këta shtetas, në bashkëpunim me njëri-tjetrin, kundërshtuan me forcë punonjësit e Policisë, me qëllim shmangien e arrestimit të A.B.,” njofton policia.

Kujtojmë që Policia e Kavajës shoqëroi disa persona pas incidentit të regjistruar rreth orës 19:10 të ditës së djeshme kur u tentua që një 38-vjeçar që kishte thyer masën e arrestit në shtëpi të shoqërohej në Komisariat. Ai dhe personat që e shoqëronin kundërshtuan urdhrin dhe u përplasën me punonjësit e policisë. Një efektiv policie qëlloi një herë me armën e shërbimit në ajër për të zbrapsur situatën. Policia thekson se personat që e shoqëronin 38-vjeçarin ishin familjarë të tij.

“Rreth orës 19:10, patrulla e Përgjithshme e Postës së Policisë Golem, bashkë me Ndihmësspecialistin e zonës, gjatë patrullimit konstatoi në rrugë shtetasin A.B., 38 vjeç, i shoqëruar nga persona të tjerë. Ai njihej nga Policia dhe ishte me masë sigurie ‘Arrest në shtëpi’ për veprën penale ‘Shkatërrimi i pronës me zjarr’. Punonjësit i kërkuan arsyen e thyerjes së masës dhe i komunikuan se do të shoqërohej në Komisariat. A.B. dhe kunati i tij, A.Sh., 23 vjeç, kundërshtuan me forcë shërbimet e Policisë, ndihmuar nga familjarët e tyre. Punonjësi me detyrë Ndihmësspecialist qëlloi një herë me armën e shërbimit në ajër për zbrapsje. Në ndihmë të tyre kanë shkuar shërbime të tjera policore, të cilat bënë shoqërimin e shtetasve të përfshirë. Gjithashtu, është shoqëruar edhe A.B., i cili kishte thyer masën e sigurisë. Veprimet hetimore po kryhen nga Oficeri i Policisë Gjyqësore i Prokurorisë së Juridiksionit të Përgjithshëm Durrës. Ndërkohë, është njoftuar edhe Agjencia e Mbikëqyrjes Policore për rastin,” shton policia.