I hynë në zyrë me armë dhe…/ Ja përse dy të rinjtë dhunuan pronarin e karburantit në Mirditë

Detaje të reja janë zbardhur në lidhje me shpalljen në kërkim të dy të rinjve në Mirditë, të cilët akuzohen se kanë dhunuar dhe kërcënuar pronarin e një karburanti.

Mësohet se 28-vjeçari Aleksander Senaj dhe 29-vjeçari me dy mbiemra Kristjan Marku alias Bashaj, kërcënuan biznesmenin me armë, pasi refuzonin të paguanin për karburantin që kishin furnizuar makinën. Ata e kanë dhunuar brenda ambienteve të biznesit dhe më pas janë larguar me automjet nga vendngjarja.

Policia po kryen kontrolle, si dhe po hetohet për të përcaktuar itinerarin e lëvizjes së automjetit ku udhëtojnë 2 të rinjtë, pas largimit nga karburanti.

Njoftimi i policisë

Dyshohet se kanosën me armë zjarri, pronarin e një karburanti, pasi e dhunuan në ambientet e biznesit të tij, për motive të dobëta, identifikohen 2 shtetasit dhe punohet intensivisht për lokalizimin dhe kapjen e tyre.

Pas kallëzimit të një 49-vjeçari, se në ambientet e karburantit që kishte në pronësi, në Mirditë, ishte dhunuar dhe kanosur me armë zjarri, nga 2 shtetas të cilët kishin refuzuar të paguanin për furnizimin e automjetit të tyre me karburant, shërbimet e Komisariatit të Policisë Mirditë kanë organizuar punën dhe kanë shkuar menjëherë në vendngjarje.

Si rezultat i veprimeve hetimore të shpejta, janë identifikuar autorët e dyshuar të këtij rasti, shtetasit K. M. alias K. B., 29 vjeç dhe A. S., 28 vjeç, ky i fundit, aktualisht në kërkim nga Policia e Tiranës, për një tentativë për vrasje.

Me qëllim lokalizimin, kapjen dhe vënien në pranga të autorëve, po kryhen kontrolle intensive, si dhe po hetohet për të përcaktuar itinerarin e lëvizjes së automjetit të këtyre 2 shtetasve, pas largimit nga karburanti.

Materialet procedurale i kaluan Prokurorisë së Lezhës, për hetime të mëtejshme.