I dënuar me burg përjetë për vrasjen e komisarit Lamaj! Gjykata Kushtetuese rihap gjykimin për Arben Frrokun

Gjykata Kushtetuese ka rihapur për gjykimin çështjen në ngarkim të Arben Frrokun, lidhur me vrasjen e komisarit Dritan Lamaj.

Seanca për Frrokun do të mbahet më 17 shkurt, në orën 10:00, teksa vendimi vjen pasi Gjykata Evropiane e të Drejtave të Njeriut urdhëroi rihapjen e dosjes Arben Frrokut, i dënuar përjetë për vrasjen e Lamajt në 2013. Strasburgu vlerësoi se procesi ndaj tij ka pasur shkelje të të drejtave të njeriut dhe duhet të rigjykohet nga Gjykata Kushtetuese e Shqipërisë.

Arben Frroku është i dënuar përjetë nga Apeli i Krimeve të Rënda për vrasjen e komisarit Lamaj, por ai ndodhet në burg në Holandë, shtet i cili ka refuzuar ekstradimin e tij. Frroku iu drejtua Gjykatës së Strasburgut pasi ankimi i tij iu rrëzua edhe në Gjykatën e Lartë më 8 qershor 2017, si edhe në Gjykatën Kushtetuese më 24 prill 2018, duke lënë në fuqi dënimin me burg përjetë.