I arrestuar për vrasjen e Elton Çiços, shtohet një tjetër akuzë ndaj Jani Aliajt! Ja dosja në Prokurori!

I konsideruar prej vitesh si një nga personat më të kërkuar në vend, Jani Aliaj, i arrestuar disa muaj më parë në Greqi për vrasjen e Elton Çiços, do të përballet në Shqipëri edhe me një tjetër proces ku është i dyshuar për vrasje në tentativë dhe trafik droge.

Bëhet fjalë për një ngjarje të ndodhur 10 vite më parë në fshatin Frashër të Përmetit, ku gjatë një tentative për grabitjen e 100 kilogramë kanabis mbeti i plagosur një person dhe që drejtësia në Shqipëri e konsideron atë të kryer nga një grup kriminal.

Çështja u hetua nga Prokuroria e Përmetit që mori të pandehur disa persona mes të cilëve edhe Aliajn, si personi që kishte porositur sasinë e lëndës narkotike për ta blerë dhe më pas organizuar grabitjen e saj.

Por Apeli i Përgjithshëm në Tiranë që mori në shqyrtim këtë dosje nga Gjykata e Përmetit, vendosi rigjykimin e saj dhe dërgimin në Gjykatën e Posaçme për shkak të kompetencës që kjo e fundit ka për gjykimin e grupeve kriminale.

Aliaj është dënuar me burgim të përjetshëm për vrasjen e Elton Çiços në një lokal në Tiranë, në maj 2016./klan