Himarë/ 22-vjeçari parkon makinën duke bllokuar zjarrfikësen, procedohet penalisht

Një 22-vjeçar nga Tirana është proceduar penalisht në Himarë, pasi parkuar gabimisht makinën dhe bllokoi rrugën, duke penguar kalimin e një mjeti zjarrfikës në situatë emergjente.

Ngjarja ndodhi në rrugën “25 Marsi”, ku automjeti tip “BMW”, i drejtuar nga shtetasi A. Sh., ishte vendosur në mënyrë të tillë që pengonte kalimin e zjarrfikëses që po ndërhynte në një emergjencë.

Policia dhe shërbimet e Qarkullimit Rrugor ndërhynë menjëherë, duke shoqëruar 22-vjeçarin në komisariat dhe duke nisur procedimin penal për veprën “Pengimi i qarkullimit të mjeteve të transportit”. Përveç ndjekjes penale, ndaj tij u vendos edhe një gjobë administrative prej 20,000 lekësh për shkelje të Kodit Rrugor.

Ky incident tregon se mungesa e përgjegjshmërisë në parkim mund të ketë pasoja serioze, sidomos kur pengohen mjetet e emergjencës që shpëtojnë jetë.