Hapja e portave të HEC-it të Banjës përmbyt tokat në Cërrik, fermerët drejt falimentimit: S’kemi zgjidhje, veçse të ikim

Hapja e portave të Hidrocentralit të Banjës ka përmbytur një sipërfaqe të konsiderueshme toke bujqësore, sera dhe ullinj në fshatrat Linas dhe Selitë, në Bashkinë e Cërrikut. Një ndër fermerët më të prekur rezulton Daniel Tafa nga fshati Linas, Njësia Administrative Mollas. Këto janë pasojat e përmbytjes, si rezultat i hapjes së portave të hidrocentralit dhe daljes nga shtrati të lumit Devoll, i cili përshkon zonën.

Fermeri thotë se brenda dy muajve është përmbytur dy herë. Rreth 3 hektarë tokë bujqësore ndodhen nën ujë, ndërsa dëmet më të mëdha janë shkaktuar në sera.Fermeri nga Cërriku ende nuk e ka bërë bilancin e dëmit ekonomik, i cili, sipas tij, është i pallogaritshëm. Ai i bën thirrje shtetit shqiptar të vërë dorë mbi fermerët, pasi janë drejt falimentimit.

Nëse nuk do të ndihmohet, thotë se do të largohet përfundimisht nga Shqipëria.U kthye para 7 vitesh nga emigrimi me shpresën se do ta ndërtonte në vendlindje të ardhmen e familjes së tij, por sot përballet me pasiguri nëse shteti shqiptar do t’i gjendet pranë.

“Të gjtiha këto që shikoni janë nga keqmenaxhimi i digës. I bëj thirrje shtetit të vërë dorë mbi fermerë sepse në këtë gjendje që jemi ne nuk ngreme kokë më. I bie që ne të largohemi e të ikim në Evropë. Ne çdo gjë e kemi këtu. Nëse na ndihmon shteti mirë, nëse jo jemi të gjithë për të iku“, shprehet fermeri Daniel Tafa.

Drejtori i Bujqësisë dhe Pyjeve në Bashkinë Cërrik, Çerçiz Shabani na njeh me dëmin real në dy njësitë administrative dhe shkakun e përmbytjeve ai e bën me dije se tashmë është ngritur një grup pune për të evidentuar të gjitha dëmet e shkaktuara, të cilat do t’i përcillen Ministrisë së Bujqësisë.

Mësohet se në dy ditët e para të hapjes së portave të Hidrocentralit të Banjës, shkarkimet kanë qenë 290 m³/sek, ndërsa së bashku me prodhimin e energjisë elektrike kanë arritur në 390 m³/sek.