Hapen regjistrimet për klasën e parë dhe të dhjetë afati deri në 31 korrik

Kanë nisur këtë të hënë regjistrimet për nxënësit që do të ndjekin klasën e parë dhe klasën e dhjetë në vitin shkollor 2026–2027. Aplikimet kryhen përmes portalit eAlbania dhe do të jenë të hapura nga data 6 deri më 31 korrik.

Prindërit e fëmijëve që regjistrohen për herë të parë në klasën e parë, si edhe ata që kalojnë nga arsimi 9-vjeçar në arsimin e mesëm, duhet të ndjekin udhëzimet e publikuara në portal gjatë procesit të aplikimit.

Regjistrimet duhet të kryhen në shkollat e përcaktuara sipas vendbanimit. Respektimi i kësaj procedure konsiderohet i rëndësishëm për planifikimin e vitit të ri shkollor, duke u mundësuar bashkive dhe zyrave vendore të arsimit organizimin e klasave, orareve të mësimit dhe shpërndarjen e nxënësve.

Përveç regjistrimeve në klasën e parë dhe të dhjetë, sistemi do të qëndrojë i hapur deri më 11 shtator edhe për nxënësit që dëshirojnë të ndjekin gjimnazin me kohë të pjesshme.

Ndërkohë, nxënësit që zgjedhin të vazhdojnë arsimin në shkollat e mesme profesionale do të kenë mundësi të aplikojnë përmes portalit eAlbania deri më 30 shtator.