Greqia shpalli “Non Grata” Artan Hoxhën, gazetarët shqiptarë protestojnë vendimin!

Ditën e djeshme Autoritetet e Republikës së Greqisë, kanë shpallur me statusin “non grata”, gazetarin investigativ Artan Hoxha, duke e cilësuar “të padëshirueshëm” dhe kërcënim për rendin publik, duke ndaluar përjetësisht për të mos shkelur në territorin grek.

Hoxha, ka qënë ditën e djeshme duke udhëtuar drejt qytetit të Janinës, kur është ndaluar nga policia greke e kufirit në pikën e kalimit kufitar të Kakavijës.

Në sportelin e policisë kufitare, ku kryhet kontrolli i pasaportave për qytetarët që hyjnë në territorin grek, gazetarit Hoxha, i është komunikuar, se nuk mund të hyjë në Republikën e Greqisë, pasi përbën rrezik për rendin publik dhe sigurinë e brendëshme të këtij shteti.

Asociacioni i Gazetarëve të Shqipërisë shpreh shqetësimin dhe proteston për vendimin e autoriteteve të Republikës së Greqisë për të shpallur “persona non grata” gazetarin investigativ shqiptar Artan Hoxha, duke i ndaluar hyrjen përgjithmonë në territorin grek.