Raportimet për gra me shami që tentonin të afronin të miturit në Tiranë, policia reagim zyrtar

Policia e Shtetit ka reaguar në lidhje me publikimin e disa videove në rrjetet sociale, ku shfaqeshin gra me shami pranë institucioneve arsimore.

Shumë prindër ngritën alarmin për sigurinë e fëmijëve, por sipas policisë gratë nuk kanë kryer veprime të kundërligjshme ndaj të miturve dhe nuk paraqesin rrezik për ta.

Blutë theksojnë se gratë e shfaqura në video janë iraniane, por të pajisura me lejeqëndrimi në vendin tonë për arsye humanitare.

Reagimi i Policisë së Shtetit: 

Duke marrë shkas nga një  lajmin i publikuar në rrjetet sociale, ku pretendohej se disa gra të mbuluara komunikonin në mënyrë të dyshimtë me të mitur, strukturat e specializuara të Policisë së Shtetit  nisën menjëherë me iniciativë, verifikimet dhe hetimet përkatëse.

Si rezultat i veprimeve të kryera, u bë i mundur identifikimi i dy shtetaseve që shfaqen në videon e publikuar.

Shtetaset, me inicialet M. G. dhe A. G., u shoqëruan më datë 21.04.2026 në ambientet e Drejtorisë Vendore të Policisë Tiranë, për kryerjen e veprimeve të mëtejshme procedurale.

Nga verifikimet e deritanishme rezulton se këto shtetase janë me shtetësi iraniane dhe janë të pajisura me leje qëndrimi në Republikën e Shqipërisë, për arsye humanitare.

Në përfundim të veprimeve hetimore paraprake, nuk ka rezultuar që këto shtetase të kenë kryer veprime të kundërligjshme ndaj të miturve.

Policia e Shtetit garanton qytetarët se, në këtë rast, nuk ekziston asnjë rrezik për sigurinë e të miturve.

Materialet procedurale i janë referuar Prokurorisë pranë Gjykatës së Juridiksionit të Përgjithshëm Tiranë, për vlerësim dhe ndjekje të mëtejshme.