Gentian Bejtja u vra nga katër persona, policia gjeti 50 gëzhoja në vendin e ngjarjes

Mbi 50 gëzhoja kallashnikovi u gjeten nga policia në oborrin e banesës së Gentjan Bejtjes që u ekzekutua pasditen e së premtes nga persona ende të panjohur.

Hetuesit zbardhen pamjet e disa kamerave të sigurisë në zonë dhe kanë vënë re se 43-vjeçari ishte i vetëm në banesë në ato momente.

Banesës i është afruar një automjet Range Rover i bardhë nga kanë zbritur 3 persona ndërsa shoferi ka qëndruar në makinën e ndezur.

Ata kanë shfrytëzuar rastin që dera ishte e hapur për të hyrë brenda ku kanë zbrazur breshëri plumbash. 43-vjeçari ka tentuar të dalë nga një derë e pasme, por nuk ka mundur të shpëtojë.

Pasi u siguruan se Bejtja ndërroi jetë, autorët u larguan në drejtim të fshatit Hasan. Në këtë zonë ata dogjën automjetin brenda të cilit u gjetën 4 kallashnikovë.

43-vjeçari Gentian Bejtja ishte një emër i njohur për policinë, pasi në të shkuarën i ka shpëtuar 3 atentateve. Në 2016-ën makina e tij u shpërthye me eksploziv, por ai nuk u lëndua.

Në 2022-in i shpëtoi një atentati në afërsi të Niklës kur u qëllua me breshëri plumbash ndaj makinës së tij.

Rasti më i fundit ishte në Korrik të vitit 2023 po në oborrin e shtëpisë së tij në Larushk, ku Bejtja u shpëtoi breshërive të plumbave, por mbeti i vrarë kunati i tij, Ramazan Sino dhe u plagos djali i tij 10 vjeç.  

Për këtë ngjarje 43-vjeçari ishte shpallur në kërkim policor për t’u marrë në pyetje, por pavarësisht kontrolleve policore në 8 muaj hetuesit nuk mundën të siguronin një dëshmi të tij.

Bejtja është i dyshuar si i përfshirë për disa ngjarje të rënda kriminale, në zonën e Krujës, por dhe me gjerë. Policia thotë se janë duke u verifikuar të gjitha pistat.

Nisur nga këto dyshime së të shkuarës, por dhe 3 atentateve ndaj tij, policia dhe prokuroria e Tiranës ka dyshime të forta se ngjarja ka si motiv hakmarrjen./klan