Foto – Kush është studenti i Akademisë së Sigurisë që u plagos në Shkodër

I riu në foto është Gjergj Ndërshtiqaj, një nga dy të plagosurit e atentatit të ndodhur mbrëmjen e sotme në Grudë të Shkodrës.

Të lënduarit janë transportuar në spital për të marrë ndihmë mjekësore. Burime nga bluzat e bardha thanë se të plagosurit janë jashtë rrezikut për jetën.

Autorët ndërkohë kanë arritur të largohen nga vendngjarja pas atentatit.

Një makinë e djegur është gjetur nga policia jo larg vendngjarjes. Dyshimet janë se mjeti është përdorur në atentat.

Njoftimi i policisë:

Shkodër/Informacion paraprak

Rreth orës 19:30, në afërsi të një lokali në fshatin Grudë e Re, është qëlluar me armë zjarri shtetasi Gj. N., rreth 30 vjeç. Si pasojë e të shtënave është plagosur edhe kunati i tij, shtetasi Gj. N., 28 vjeç, student në Akademinë e Sigurisë. Të dy këta shtetas janë transportuar në spital, për ndihmë mjekësore.

Në drejtim të vendit të ngjarjes janë nisur shërbimet e Policisë, drejtuesit e Drejtorisë Vendore të Policisë dhe të Komisariatit të Policisë Shkodër.

Në ndihmë të Policisë vendore janë nisur disa grupe të Forcës Kombëtare të Sigurisë dhe të RENEA-s, si dhe specialistë nga Departamenti i Policisë Kriminale në Policinë e Shtetit.

Shërbimet e Policisë, gjatë kontrollit të zonës, për kapjen e autorëve, në afërsi të vendit të ngjarjes, kanë konstatuar duke u djegur një automjet tip “Renault”, i cili dyshohet se është përdorur nga autorët.

Grupi hetimor, në drejtimin e Prokurorisë, po punon për zbardhjen e plotë të rrethanave të ngjarjes dhe identifikimin e autorit.

Pas sqarimit të rrethanave të ngjarjes dhe në përfundim të veprimeve të para, do të ketë informacion më të detajuar për këtë rast.