FOTO/ Ja për cilin dokument ka dyshime SPAK se Shkëlzen Berisha ka gisht tek “Gërdeci”

Ditën e sotme Shkëlzen Berisha u paraqit për herë të parë para prokurorëve të SPAK për të dhënë përgjigje për lidhjen e tij me tragjedinë e Gërdecit, ku humbën jetën 26 qytetarë të pafajshëm.

Berisha pasi doli jashtë ambienteve të SPAK, ndaloi për të dhënë një prononcim të shkurtër për mediat, duke u shprehur se ishte thirrur për tu marrë në pyetje nga prokurori i çështjes së Gërdecit, Klodian Braho.

Në fjalën e tij, djali i kryedemokratit tha se SPAK duhet të hetojë se kush e ka bërë kaligrafinë e dokumentit që po hetohet, e po ashtu theksoi se i bën përshtypje sesi i njëjti prokuror 15 vite më parë nuk e kishte parë të arsyeshme thirrjen e tij për të dëshmuar. Ndërsa sot e kërkon me statusin e personit në dijeni.

Emri i Shkëlzen Berishës është lakuar jo vetëm në media, por edhe në një shkresë ku shkruhej “për Shkëlzen Berishën” përpara tragjedisë së “Gërdecit”.

Çfarë ishte dokument?

Një shkrim i zakonshëm dore, mbi një shkresë zyrtare të Ministrisë së Drejtësisë, dyshohet se ishte filli i një sërë procedurash për ndërtimin e fabrikës në Gërdec.

Dokumenti i shumëpërfolur në qarqet politike të Tiranës dhe në Kuvendin e Shqipërisë, dyshohet se është një faks i nisur nga zyra e ish-ministrit Aldo Bumçi dhe që mban shënimin: “për Shkëlzen Berishën” në anë të letrës.

Dokumenti

Dokumenti i firmosur nga Bumçi asokohe, dyshohet se miratonte lëvizjen ligjore për të përligjur demontimin e armëve në Gërdec dhe i drejtohej ministrit të Mbrojtjes së asaj kohe, Fatmir Mediu.

Hetimi dhe mohimi

I thirrur nga SPAK si person që ka dijeni, disa javë më parë Aldo Bumçi u ndal gjatë tek kjo shkresë që hodhi dyshime mbi të, në anë të së cilës ishte shkruar emri i Shkëlzen Berishës, djali i ish-kryeministrit Berisha në atë kohë.

Bumçi mohoi që shënimi të ishte i vërtetë dhe hodhi akuza se ajo është falsifikuar, pasi shkrimi i dorës nuk është i tij.

Duke kërkuar një hetim të kaligrafisë në këtë rast, ish-ministri u shpreh se kronologjia e ngjarjes nuk përputhet me dokumentet.

Kujtojmë se pak ditë më parë SPAK i komunikoi akuzën për shpërdorim detyre ish-ministrit të Mbrojtjes, Fatmir Mediu.