Ermonela Jaho dhe Placido Domingo në hapjen e TKOB me 15 shtator, kanë një mesazh për shqiptarët (Video)

Ermonela Jaho dhe Placido Domingo do ngjiten në skenën e Teatrit të Operas dhe Baletit më 15 shtator, në një mbrëmje gala. Kujtojmë se Teatri po hapet pas 5 vitesh. Për këtë mbrëmje, ka folur Ermonela Jaho por edhe legjenda botërore Placido Domingo.

Në një videomesazh, të publikuar nga kryeministri Edi Rama, Jaho shprehet: “Përshëndetje të gjithëve! Jam shumë e lumtur që të marr pjesë në hapjen e Teatrit tonë Kombëtar të Operas dhe Baletit, në mes të artistëve të mi bashkëkombës dhe me pjesëmarrjen e legjendës botërore Placido Domingo. Një falënderim i madh për të gjithë ata breza artistësh që kontribuuan në themelimin dhe krijuan traditën e këtij institucioni. Një falënderim i veçantë për ata qe ideuan dhe realizuan atë projekt. Kur punojmë të gjithë sëbashku drejt të njëjtit qëllim asgjë nuk është e pamundur! Ju pres të gjithë në datën 15 në Teatrin e Operas dhe Baletit, në galanë e hapjes së teatrit. Mirupafshim”

“Të dashur miq në Tiranë. Jam i nderuar të këndoj në Ceremoninë e “Grand Gala” për inaugurimin e Teatrit Kombëtar të Operas dhe Baletit në Tiranë. Pas 5 vitesh ky teatër më në fund do të vijë në jetë dhe do të rikthehet për të mirëpritur performanca koncertale, opera dhe baleti. Është gëzim i madh për mua që të jem me ju për këtë mbrëmje speciale, me kolegë të mrekullueshëm. Shihemi me 15 shtator, për ta shijuar të gjithë sëbashku skenën e re pas rikonstruksionit të plotë”, tha Domingo./shqiptarja