Dyshohet për vrasjen e bashkëpunëtorit të drejtësisë, arrestohet shqiptari në Slloveni

Një 40-vjeçar shqiptar me identitete të shumta, është arrestuar në Slloveni në lidhje me një vrasje të ndodhur në fillim të dhjetorit pranë Lubjanës. Së bashku me dy bashkëpunëtorë, ai dyshohet se ka vrarë një bashkëpunëtor të drejtësisë, vrasja e të cilit tronditi rajonin.

Po ashtu për të njejtin person Policia Italiane, në veçanti prokuroria Busto Arsizio, kishin aktivizuar alarmin për identifikimin e tij, pasi ai kërkohej si i dyshuar për vrasjen e një ukrainasi në shtetin fqinj.

Ndjekja filloi pas krimit të Vadym Usatyi , një 46-vjeçari i pastrehë ukrainas, i vrarë nga dy të shtëna me armë në mbrëmjen e 27 tetorit në Saronno, në provincën e Varese . Hetuesit identifikuan 40-vjeçarin si të dyshuarin kryesor, duke krijuar një pamje të bashkëpunimeve kriminale që shtrihen përtej kufijve kombëtarë.

Hetimet filluan menjëherë pas krimit dhe falë analizave të avancuara teknologjike si analiza e celularëve dhe monitorimi i kamerave të sigurisë, u arrit të gjurmoheshin lëvizjet e të dyshuarit, i cili kishte ikur në Zvicër dhe më pas ishte kthyer në Itali.

Gjurmët telefonike dhe përgjimet e tjera kanë çuar në identifikimin e vendndodhjes së tij, duke mundësuar bashkëpunimin me autoritetet sllovene për kapjen e tij.

Autoritetet italiane janë duke pritur për verifikimin e identitetit të të arrestuarit përmes gjurmëve të gishtave, një hap i rëndësishëm për nisjen e procedurave ligjore. Ky zhvillim hap rrugë për procedurat e ekstradimit dhe mundësitë e ndjekjes penale ndërkombëtare.