Dita e vendimit për katërshen e UÇK-së/ Lirim apo dënim për ish-udhëheqësit në Speciale?

Dhomat e Specializuara të Kosovës, të njohura si Gjykata Speciale, me seli në Hagë, pritet që sot të shpallin vendimin ndaj ish-krerëve të Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi.

Seanca gjyqësore pritet të fillojë në orën 10:00 sipas kohës së Hagës, ndërsa transmetimi nga salla e gjyqit do të jetë dhjetë minuta me vonesë. Sipas njoftimit zyrtar, seanca pritet të zgjasë rreth dy orë.

Shpallja e aktgjykimit vjen pas një procesi gjyqësor që zgjati afërsisht gjashtë vjet. Katër ish-drejtuesit e UÇK-së akuzohen për krime lufte dhe krime kundër njerëzimit. Të gjithë ata i kanë mohuar akuzat dhe janë deklaruar të pafajshëm për të gjitha pikat e aktakuzës.

Në fund, Prokuroria në pretencën e saj kërkoi që ish-krerët e UÇK-së të shpallen fajtorë në të gjitha pikat e aktakuzës dhe të dënohen me nga 45 vjet burgim secili. Mbrojtja e ish-krerëve të UÇK-së i ka hedhur poshtë ato, duke i cilësuar të pabaza.