Dhunë në familje, arrestohet 38-vjeçari në Cërrik, rrahu gruan në sy të fëmijëve

Një tjetër rast tronditës dhune në familje është shënuar në Cërrik. Marsid Musta, 38 vjeç, është arrestuar nga policia pas denoncimit të bashkëshortes së tij, e cila raportoi se ishte dhunuar fizikisht dhe psikologjikisht nga burri – në sy të fëmijëve të tyre të mitur.

Ngjarja ndodhi rreth mesnatës, kur një grindje e zgjatur mes çiftit degjeneroi në dhunë. Burime zyrtare bëjnë me dije se fillimisht Musta ka ushtruar dhunë verbale, me kërcënime dhe fyerje të vazhdueshme, e më pas ka kaluar në goditje fizike ndaj 29-vjeçares.

Pavarësisht përpjekjeve të fëmijëve për të ndërhyrë, dhuna nuk është ndalur deri kur gruaja ka mundur të largohet dhe të shkojë në komisariatin e policisë në orën 02:25 të mëngjesit, ku ka bërë denoncimin.

Policia ka reaguar menjëherë duke arrestuar agresorin dhe duke lëshuar një urdhër mbrojtjeje për viktimën. Ngjarja është në hetim, ndërkohë që ky rast i shtohet numrit në rritje të raportimeve për dhunë në familje gjatë kësaj vere në zonën e Cërrikut.