Denoncimi i pazakontë nga Shijaku: Gjendja Civile më bëri me ‘motër’, futi gabimisht komshien te ....

Fiks Fare denoncoi mbrëmjen e së enjtes një problematikë me Gjendjen Civile, ku një qytetar ankohet se gabimisht i kanë futur një komshie në certifikatën familjare.

Qytetarja e regjistruar gabim në atë trung familjar, hapi gjyqin për korrigjimin e akteve të lindjes, por ende nuk i është bërë korrigjimi në sistem, duke penguar denoncuesit të mos bëjnë asnjë veprim me hipoteka, në gjendjen civile, te noteri.

Në redaksinë e emisionit Fiks Fare është ankuar Elmaz Gjepali, i biri i Feim dhe Mejte Gjepalit nga Shijaku. Elmazi ankohet se në trungun familjar, në certifikatat e familjes së tij, është futur gabimisht një banore tjetër e Shijakut. Ai thotë se një shtetase, E.Gjepali, e lindur më 10 mars 1992, figuron në certifikatat familjare dhe gabimi është bërë nga zyra e Gjendjes Civile në Gjepalaj, Shijak.

Ai thotë se shtetësja në fjalë kishte atësinë dhe mbiemrin njësoj si ai, ndërkohë që Gjendja Civile i ka ndryshuar emrin e nënës, në certifikatën e lindjes. Elmazi vijon se, vetë qytetarja në fjalë ka hapur një gjyq në Gjykatën e Rrethit Gjyqësor në Durrës, ku është vendosur korrigjimi i aktit të lindjes. Gjykata ka bërë korrigjimin e aktit të lindjes, ku në vend të amësisë “Mejte” është vendosur amësia “Zeqine”. Vendimi i Gjykatës së Durrësit, i datës 01 mars 2011, i formës së prerë, është depozituar në zyrën e Gjendjes Civile në Gjepalaj, apo në zyra të tjera të Gjendjes Civile, ku E.Gjepali është martuar.

Por, pikërisht këtu ka filluar kalvari i familjes së ankuesit, Elmaz Feim Gjepali. Babai i tij, Feimi dhe nëna e tij, Mejte, kanë ndërruar jetë. Elmazi ka kërkuar nxjerrjen e dëshmisë së trashëgimisë dhe rezulton se në trungun familjar nga viti 1991 (vit në të cilin nuk kishte lindur E.) e deri në vitin 2012, në certifikatat e tyre familjare del emri i E.Gjepalit, pavarësisht se ka një vendim të formës së prerë.

Qytetari kërkon që emri i saj të hiqet nga çdo certifikatë ndër vite e trungut familjar, pasi prania e saj, dëmton rëndë ekonomikisht dhe moralisht interesat e kësaj familje, duke e penguar të veprojë në zyrat noteriale dhe në zyrat e shtetit.

Pas ankesës, qytetari shkon te Gjendja Civile në Shijak për të pyetur dhe për të rregulluar të gjithë problematikën. Punonjësja i thotë se gabimi është bërë vite më parë dhe se ajo e ka të pamundur që të futet në sistem dhe të ndryshojë aktet e lindjes. Punonjësja i thotë se ajo zyrë vetëm kaq mund të bëjë aktualisht, dhe se veprimet në regjistër bëhen nga Drejtoria e Përgjithshme e Gjendjes Civile.

Gjendja Civile e Shijakut, në një përgjigje për Fiks Fare, thotë se historiku i kësaj problematike lidhet që në aktin e lindjes, ku është regjistruar gabim me amësi Mejte dhe jo Zeqine siç është lindur. Këto të dhëna janë hedhur gabimisht nga nëpunësi i Gjendjes Civile Gjepalaj, për shkak të emrit të njëjtë në atësi, por me amësi të ndryshme.

Gjykata, thotë Gjendja Civile, ka vendosur që të kryhet korrigjimi i dhënies së aktit të lindjes, me ndryshimin e amësisë. Në përgjigje, kjo zyrë shton se korrigjimi bëhet vetëm nga Drejtoria e Përgjithshme e Gjendjes Civile në Tiranë. Fiks Fare iu drejtua me një kërkesë zyrtare kësaj drejtorie, e cila tha se ka urdhëruar korrigjimin e regjistrit, duke iu drejtuar me një shkresë operatorit që mirëmban këtë sistem.