Beqja merr fashikujt e dosjes së Sterilizimit, i transporton me valixhe nga SPAK

Ish-ministri i Shëndetësisë Ilir Beqja është paraqitur këtë të premte në Prokurorinë e Posaçme ku ka marrë në dispozicion fashikujt e dosjes hetimore në ngarkim të tij.

Beqja ka dalë nga ambientet e SPAK i shoqëruar nga avokatët, por ajo që bie në sy është sasia e madhe e akteve në dosje. Për të marrë të gjithë fashikujt ish-ministrit të Shëndetësisë i është dashur një valixhe për të kryer transportin.

Kur u pyet në lidhje me valixhen, ish ministri i Shëndetësisë u përgjigj në derën e SPAK, se “ka marrë dokumentet, përderisa dosja është e madhe”.

Kujtojmë se SPAK ka mbyllur hetimet dhe ka dërguar në gjykatë dosjen për “Sterilizimin” në ngarkim të ish-ministrit së Shëndetësisë.

Beqja akuzohet për veprën penale “Shpërdorim i detyrës”, ndërsa do të jetë në bankën e të akuzuarve së bashku me ish-zëvendësin, Klodian Rrjepaj dhe biznesmenin Ilir Rrapaj që mori kontratën.

Hetimet për koncesionin e sterilizimit janë kryer nga prokurorët Edvin Kondili dhe Ened Nakuçi, ndërsa SPAK akuzon për shkelje me vlerë 100 milionë euro.

Prokuroria thotë se në dhënien e koncesionit të akuzuarit nuk kanë respektuar ligjin dhe kanë shpërdorur detyrën. Ndër gjetjet e konstatuara nga SPAK janë edhe procedurat e ndjekura për fituesin por dhe mos realizimi i kushteve të parashikuara në kontratë.