Behgjet Pacolli e Halil Kastrati bëhen bashkë, gati për t’i ofruar shtëpi e ndihmë këngëtares Parashqevi Simaku

Kryetari i Aleancës Kosova e Re, Behgjet Pacolli ka bërë me dije se ka zhvilluar një takim me humanistin Halil Kastrati dhe ish-konsullin e Kosovës në Kanada, Donat Syla.

Në fokus te diskutimit të tyre ka qenë gjendja e rëndë e ikonës së muzikës shqiptare Parashqevi Simaku.

Po ashtu, përmes një postimi në rrjetet sociale, Pacolli bëri të ditur gatishmërinë e Shoqatës “Jetimat e Ballkanit” dhe Fondacionit “Behgjet Pacolli” për të ofruar një shtëpi për Parashqevi Simakun dhe për të mbuluar të gjitha shpenzimet e nevojshme për transferimin e saj në Kosovë ose Shqipëri.

“Kjo është një mundësi për shoqërinë tonë të përkujdeset për personalitetet që kanë dhënë shumë për kombin”, ka shkruar Pacolli në postimin e tij.