Autoshkollat: Do rrisim çmimet, jemi goditur nga shtrenjtimi i karburanteve

Rritja e çmimit të karburantit, si pasojë e tensioneve dhe konfliktit në Lindjen e Mesme, po ndikon drejtpërdrejt te bizneset që e kanë naftën si lëndë bazë pune, mes tyre edhe autoshkollat.

Operatorët e këtij sektori në Elbasan paralajmërojnë se nëse situata vazhdon, mund të ketë rritje të çmimeve për marrjen e patentës, si dhe rrezik për paralizim të aktivitetit.

Drejtuesi i një autoshkolle në Elbasan, Qani Xhafa, u shpreh se sektori po përballet me vështirësi serioze nga rritja e çmimit të naftës dhe kërkoi ndërhyrje nga qeveria.

“Sektori i autoshkollave do të paralizohet nga rritja e këtij çmimi. I bëj thirrje qeverisë të marrë masa, qoftë me heqjen e përkohshme të taksave mbi litrin e naftës apo me forma të tjera kompensimi, siç është vepruar me transportin publik apo bujqësinë,” tha ai.

Sipas përfaqësuesve të autoshkollave, alternativat si përdorimi i mjeteve elektrike apo me gaz nuk konsiderohen praktike për kursantët e rinj, çka e bën më të vështirë përballimin e situatës.

Ata shtojnë se aktualisht po vijojnë punën me të njëjtat tarifa, pavarësisht kostove në rritje, duke ulur ndjeshëm fitimet dhe duke vënë në pikëpyetje qëndrueshmërinë e aktivitetit në muajt në vijim.