Arrestohet në aeroportin e Sacramentos me pajisje shpërthyese

Një 49-vjeçar nga Sacramento u ndalua në Aeroportin Ndërkombëtar të qytetit pasi tentoi të kalonte kontrollin e sigurisë me një pajisje shpërthyese të improvizuar, thikë, çakmak, lidhëse plastike dhe pesë telefona celularë. Njëri prej telefonave kishte të aktivizuar një kohëmatës 15-minutësh.

Prokurori federal Eric Grant tha se pajisja, e përbërë nga një tub kartoni me fitil, u testua nga ekspertët e bombave dhe rezultoi funksionale, me potencial për të dëmtuar një avion në fluturim. Oficerët e sigurisë e izoluan menjëherë zonën dhe përdorën pajisje speciale për neutralizimin e rrezikut.

I dyshuari u arrestua të shtunën dhe doli para gjykatës federale të mërkurën, ku akuzohet për posedim të paligjshëm të materialeve shpërthyese në aeroport. Avokatja e tij mbrojtëse, Meghan McLoughlin, deklaroi se procesi gjyqësor do të zbulojë edhe versionin e klientit të saj.

Ky rast rikujton masat e rrepta të sigurisë në aeroportet amerikane, të vendosura pas tentativës së vitit 2001 nga i njohuri si “bombarduesi me këpucë”, Richard Reid.