Arratisja e Altin Ndocit, ministri Lamallari: Drejtori nuk njoftoi drejtorinë e Burgjeve për vizitën

Ministri i Drejtësisë Besfort Lamallari në një konferencë për mediat komentoi arratisjen e Altin Ndocit, për të cilin ende nuk ka asnjë gjurmë.

Lamallari tha se masat ishin të menjëhershme, me shkarkimin e drejtorit të Burgut dhe gjithë zinxhirit komandues. Lamallari tha se i ka kërkuar Shërbimit të Kontrollit të Burgjeve, rritje të hetimeve proaktive në të gjithë burgjet për të shmangur situata të ngjashme.

“Reagimi i ministrisë ishte i shpejtë, duke nisur nga pezullimi i zinxhirit përgjegjës dhe duke i vënë në dispozicion të hetimit penal, u shkarkua drejtori i burgut, por duke bërë me këtë rast edhe transferimin të dënuarve në burgje më siguri më të lartë. Krahas këtyre masave, i kam kërkuar Shërbimit të Kontrollit të Burgjeve, rritje të hetimeve proaktive në të gjithë burgjet për të shmangur situata të ngjashme, apo edhe evidentimin e paligjshmërive që kanë të bëjnë me futjen e sendeve të paligjshme. Kjo kërkon masa më të gjera se një rast konkret.

Këto vizita nuk ishin njoftuar as në drejtorinë e burgjeve, kjo ka qenë arsyeja pse kam marrë vendimin për shkarkimin e drejtorit i kam kërkuar Shërbimit të Kontrollit të Burgjeve të jenë të pranishëm në çdo IEVP, për të garantuar evidentimin e këtyre situatave, është raport që po përgatitet. Ka informacione ditore që përcillen nga Shërbimi i Kontrollit të Burgjeve”, tha Lamallari.