Arratisja e Altin Ndocit, burgos 3 zyrtarë/ Gjykata e Durrësit jep masat e sigurisë…

Tetë zyrtarët e arrestuar pas arratisjes më 13 janar 2026, të Altin Ndocit nga Spitali i Durrësit janë paraqitur para gjykatës, ku janë njohur me masat e sigurisë.

Prokuroria e qytetit bregdetar kishte kërkuar arrest me burg për të gjithë 8 zyrtarët, të cilët akuzohen për shpërdorim detyre, por gjykata vendosi të tregojë më shumë butësi.

Gjykata vendosi të lërë në burg zv/ shefin e Policisë së Burgut, Dezdemon Pazaj, si dhe dy prej efektivëve që e shoqëronin atë ditë, konkretisht Sali Feçollarin dhe Fatjon Baçin.

Ndërkohë, në arrest shtëpie gjenden specialistja e informacionit, Violeta Uka, dhe kryeinfermier i repartit infektiv, Aulon Çuku.

Ndaj tre gardianëve të tjerë — Arianit Cela, Preng Marvataj dhe Dorjan Saraçi — Gjykata e Durrësit caktoi masën e sigurisë “detyrim paraqitjeje”.

Po ashtu, në kuadër të kësaj çështjeje, më 16 janar u arrestua edhe ish-drejtori i Burgut të Durrësit, Indrit Cerloj, ndërsa për mjeken e burgut, Ylfete Sema, e cila kishte rekomanduar vizitën e Ndocit në spital, u vendos arrest shtëpie.

Altin Ndoci u arratis nga Spitali i Durrësit mesditën e 13 janarit, duke shpëtuar nga gardianët që e shoqëronin. Ai doli me vrap nga ambientet e spitalit dhe u drejtua drejt parkimit, ku e priste një makinë luksoze Audi, me të cilën u largua drejt Spitallës, ku humbi dhe gjurmët.

Prokuroria e qytetit bregdetar vijon hetimet lidhur me shkeljen e procedurave të protokollit të sigurisë gjatë transportimit të tij nga burgu në spital, si dhe takimet e tij të fundit në burg, ku dyshohet se është ideuar arratisja.

Altin Ndoci është arrestuar nga SPAK në Tiranë në vitin 2020 gjatë operacionit “Plumbi i Artë”, i akuzuar për vrasje me pagesë, grabitje dhe trafik droge për llogari të klanit Copja/SOT