Aksident tragjik në Don Bosko / Makina përplaset me motorin, humb jetën drejtuesi (EMRI)

Një aksident i rëndë rrugor është regjistruar në zonën e Don Boskos në Tiranë, ku një burrë ka humbur jetën pas përplasjes me një automjet.

64-vjeçari, i identifikuar si Prend Ndreu, po lëvizte me motor dhe është përplasur nga një makinë. Si pasojë e përplasjes, Ndreu ka marrë plagë të rënda, të cilave nuk u mbijetoi edhe pse u transportua me urgjencë drejt Spitalit të Traumës.

Në vendngjarje kanë mbërritur shërbimet e policisë, të cilat kanë nisur hetimet për të përcaktuar rrethanat dhe shkaqet e përplasjes.

Tiranë / Informacion paraprak

Më datë 22.09.2026, rreth orës 14:50, në lagjen "Don Bosko", automjeti me drejtues shtetasin F. F., rreth 42 vjeç, është përplasur me një motomjet me drejtues shtetasin P. N., rreth 64 vjeç.

Si pasojë e përplasjes, drejtuesi i motomjetit ka humbur jetën. Ndërkohë, drejtuesi i automjetit është shoqëruar në komisariat për veprime të mëtejshme procedurale.

Grupi hetimor ndodhet në vendngjarje dhe po punon për sqarimin e plotë të rrethanave të aksidentit.