Drogë, kallashnikov dhe armë gjahu, arrestohet adoleshenti në Malësinë e Madhe

Një 17-vjeçar është arrestuar në Malësinë e Madhe, ndërsa një 16-vjeçar është vënë nën hetim. Dy adoleshentët akuzohen për posedim armësh, lëndësh narkotike dhe sende të tjera të kundërligjshme.

“Shërbimet e Komisariatit të Policisë Malësi e Madhe vunë në pranga një 17-vjeçar dhe referuan materialet në Prokurori, ku nisi procedimi në gjendje të lirë për një 16-vjeçar, pasi dyshohet se posedonin 1 armë zjarri kallashnikov, 1 armë gjahu, 23 fishekë luftarak, 1 maskë dhe një sasi të vogël lënde narkotike cannabis sativa, të cilat u gjetën dhe u sekuestruan nga shërbimet e Policisë”, thuhet në njoftimin zyrtar.

Arma e zjarrit dhe sendet e tjera do të dërgohen në Institutin e Policisë Shkencore, për ekspertizë të mëtejshme.