Barcelona në krizë ekonomike, nxjerr dollapin e Lionel Messit në ankand

Barcelona është duke u përpjekur të dalë nga kriza ekonomike duke përdorur metoda të papara më parë, si shitja e objekteve të përdorura në stadiumin “Camp Nou” përmes një ankandi.

Ky ankand do të fillojë më 23 janar dhe do të mbyllet më 13 shkurt. Më i çmuari është dollapi i përdorur nga Lionel Messi, për të cilin do të kërkohet një ofertë minimale prej 350 mijë dollarësh.

Për dollapët e përdorur nga legjenda të tjera të klubit si Maradona, Guardiola, Piqué dhe Ronaldinho, çmimi fillestar është 100 mijë dollarë, ndërsa për atë të Dembele, i cili tani luan për PSG, çmimi fillon nga 2,500 dollarë.

Po ashtu, do të jenë të disponueshme fotografi të skuadrave që fituan pesë Ligat e Kampionëve (1991-92, 2005-06, 2008-09, 2010-11, 2014-15), të cilat do të ekspozohen në dhomat e zhveshjes dhe në tunelin e stadiumit. Në total, vlera e objekteve në ankand është rreth 1 milionë euro, duke llogaritur vetëm çmimet fillestare.