Zbulohet dokumenti i SPAK, ja pse u mor i pandehur dhe për çfarë akuzohet Sali Berisha

Tirane - Kryetari i PD Sali Berisha u paraqit dje para ambienteve të Prokurorisë së Posaçme, ku iu komunikua akuza.

Në dokument, thuhet se Berisha u mor i pandehur nga SPAK dhe se iu komunikua e njëjta akuzë, ajo e ‘korrupsionit pasiv të funksionarëve të lartë shtetërore ose i të zgjedhurve vendorë”, kryer në bashkëpunim.

Lideri i opozitës, megjithëse ishte thirrur të paraqitej në Prokurorinë e Posaçme në orën 12:00, zgjodhi që fillimisht të takonte militantët që kishin dalë ta mbështesnin, sipas porosisë së Flamur Nokës, por edhe për të komunikuar me gazetarët.

Pak pas orës 12:20, Berisha i shoqëruar nga avokati i tij Genc Gjokutaj i janë drejtuar detektorit të vendosur në hyrje në SPAK.

Berisha dhe Gjokutaj në Prokurorinë e Posaçme janë pritur nga dy prokurorët e çështjes Arben Kraja dhe Enkelejda Millonai. Biseda e tyre ka qenë formale, aq sa dy prokurorët i kanë dhënë dosjen me akuzat ish-kryeministrit, që siç bëri të ditur për mediat ishte rreth 500 faqe.

Më pas Berisha la SPAK-un dhe iu drejtua sërish mediave, ku njoftoi se ishte marrë i pandehur./top channel