Ferit Hoxha: Nuk do ta sjellim Kosovën në “KS”, dialogu në Bruksel

Shqipëria këtë muaj mori udhëheqjen e Presidencës së Këshillit të Sigurimit të OKB-së. Ambasadori i Shqipërisë, Ferit Hoxha ka mbajtur fjalimin e parë me marrjen e Presidencës.

Njëri nga gazetarët e pyeti nëse Kosova do të jetë temë diskutimi e Këshillit të Sigurimit derisa Shqipëria është në krye gjatë shtatorit dhe se çfarë do të bëjë Shqipëria për të përmirësuar situatën.

“Është një gjë që e di shumë, shumë mirë. Po provoj ta bëj në një minutë. Çështja e Kosovës dhe misioni i Kombeve të Bashkuara në Kosovë është në agjendën e Këshillit të Sigurimit.

Ka qenë disa herë, është reduktuar disa herë dhe për arsye të mira”, tha Hoxha, derisa shtoi se Shqipëria ka kontribuar për ta zvogëluar numrin e diskutimeve për Kosovën në KS të OKB-së.

Ai tha se reduktimi ka ndodhur për dy arsye. “Së pari, asgjë e madhe nuk ka ndodhur dhe së dyti Këshilli i Sigurimit nuk ka ndihmuar në të vërtetë në procesin e dialogut. Siç e dini procesi i dialogut është transferuar në Bruksel”, tha ambasadori.

Hoxha tha se po të arrihet që marrëveshja e fundit Kosovë-Serbi s’do të jetë nevoja më që tema për Kosovën të shtrohet në Këshill të Sigurimit. Ai tha se marrëveshja e nxjerr Serbinë nga lidhja e saj me ish-Jugosllavinë dhe Kosovës i hap rrugën e integrimit në BE.