Dyshohen për krime lufte, ngrihet aktakuzë ndaj dy serbëve! Prokuroria: Ja çfarë zbuluan hetimet

Prokuroria Speciale e Kosovës njoftoi të hënën se ka ngritur aktakuzë kundër dy serbëve të dyshuar për krime lufte kundër popullsisë civile gjatë luftës në Kosovë më 1998-’99.

Prokuroria i ngarkon të dyshuarit me inicialet M.P dhe Zh.Z me një sërë akuzash si, vrasje, torturë, trajtim çnjerëzor, frikësim, shkatërrim të pasurisë, dëbim masiv dhe spastrim etnik të popullatës civile të nacionalitetit shqiptar në Komunën e Istogut gjatë luftës së fundit në Kosovë.

“Hetimet kanë zbuluar se gjatë periudhës kohore relevante për këtë aktakuzë, pati dy raste të dhunës seksuale ndaj viktimave të nacionalitet shqiptar. Gjithashtu, gjatë hetimeve u vërtetua se gjatë periudhës së luftës, në Komunën e Istogut, rreth 5 mijë shtëpi janë djegur, rreth 250 persona janë vrarë prej tyre 19 viktima fëmijë dhe shumë dëme tjera materiale”, thuhet në njoftim.