Rrëfimi i Dumanit/ Afrohet vala e dytë e arrestimeve nga SPAK

Aktualitet

Rrëfimi i Dumanit/ Afrohet vala e dytë e arrestimeve nga SPAK

Një javë pas operacionit "Plumbi i Artë", SPAK bëhet gati për një valë të dytë arrestimesh.

Shkak është bërë dëshmia e detajuar e bashkëpunëtorit të drejtësisë Nuredin Dumani, i cili mësohet se ka nxjerrë në pah rreth 100 emra të rinj të botës së errët të krimit në vendin tonë.

Nuredin Dumani, dhe miku i tij, Henrik Hoxhaj, deri në këtë fazë të hetimeve konsiderohen nga SPAK si njerëzit më të rëndësishëm që kanë bashkëpunuar me prokurorinë, duke treguar pjesëmarrjen në disa vrasje dhe tentativa vrasjesh të dështuara.

Merr lajme ekskluzive në Viber

Doni të informoheni të parët për lajme ekskluzive? Bashkohuni me grupin tonë në Viber duke klikuar këtu.

Burime nga SPAK, Dumani në dëshminë e tij, ka nxjerrë rreth 100 emra të personave të botës së krimit në Shqipëri, që veprojnë në disa qytete.

Një pjesë e këtyre emrave, janë arrestuar dhe shpallur në kërkim me vendim gjykate, ndërsa për pjesën tjetër thanë burimet, vijohet të hetohet në çdo moment.

Ndërkohë SPAK, është duke përgatitur terrenin për një valë të dytë arrestimesh, në zonën e Fushë-Krujës, Fierit dhe Vlorës, vende këto ku besohet se Nuredin Dumani dhe grupi i miqve të tij, kanë kryer vrasje me pagesë për llogari të personave të tjerë që kanë influencë të madhe kriminale në këto zona.

Sipas SPAK, Hoxhaj dhe Dumani, kanë vepruar si grup kriminal në disa ngjarje të rënda, ku dyshohet se kryenin vrasje me pagesë në disa qytete.

Shumë nga vrasjet, janë dëshmuar para prokurorëve, ku rrëfimet e tyre jo vetëm janë mbajtur shënim, por edhe janë filmuar e regjistruar në cilësinë e provës materiale.

Dumani dhe Hoxhaj, mësohet se kanë treguar dhe anëtarët e grupit të Talo Çelës, që vijon të qëndrojë prej disa vitesh në arrati.

Një javë më parë SPAK dhe Policia e Shtetit, finalizuan operacionin “Plumbi i Artë”, duke lëshuar 32 masa arresti, ku 18 prej tyre u arrestuan ndërsa 14 të tjera janë shpallur në kërkim.

 

ME TE LEXUARAT